.
.
In ’n poging om bestaansboere te help, het Thoko Didiza, minister van landbou, grondhervorming en landelike ontwikkeling, Maandag ’n plan aangekondig waarmee van dié boere tussen R1000 en R9 000 van haar departement sal ontvang.
Die stelsel maak plek vir 150 000 aansoeke, maar net 75 000 sal kwalifiseer.
Die hulp sal in die vorm van koopbewyse wees.
Didiza het die aankondiging oor die hulppakkette op ’n mediakonferensie in Pretoria gedoen.
Die plan is deel van die presidensiële werkskepping-stimulusprogram van R1 miljard wat vroeër deur pres. Cyril Ramaphosa aangekondig is om meer as 75 000 bestaansboere te help om te herstel ná die Covid-19-pandemie.
Die doel met die stimulusprogram is om die ekonomie in sy geheel te laat herstel. Didiza het vroeër aangekondig die regering hoop om uiteindelik deur dié plan 317 000 nuwe werksgeleenthede te skep, die meeste deur belanghebbendes in die private sektor wat betrokke is in die vrugte-, wyn-, neut-, groente- en landbouverwerkingsbedryf.
Hoewel die hele landboustelsel negatief geraak is, is bestaansboere en mense wat vir huishoudelike gebruik produseer, die ergste getref, sê die minister.
