Na ’n lang en kleurryke loopbaan ontvang dr. Braam Hanekom op Sondag 13 April, tydens die oggenddiens, demissie van die Sinode. Braam was voorheen een van Stellenberg-gemeente se voltydse leraars en ons het in Mei 2014 van hom afskeid geneem nadat hy deur die Wes-Kaap se Sinode in diens geneem is. Hy tree einde April  as die Direkteur van die Sentrum vir Publieke Getuienis af. Stellenberg-weekliks het met hom oor sy interessante en suksesvolle loopbaan gesels.

“Ek is na skool gekeur om medies te studeer en het aanvanklik as mediese student ingeval, maar na ’n dramatiese ervaring in die begin van my eerste jaar het ek besluit om van kursus te verander en in diens van die Here teologie te gaan studeer,” sê Braam.  “Toe ek my weer kom kry, het ek die chemieklas vir ’n Grieksklas verruil en die res was soos hulle sê . . .  geskiedenis.” Lees meer . . .

Ons is opgewonde om die familiediens se nuwe musiekleier aan lidmate voor te stel.  Chanelle Maree gaan vanaf die Sondag 13 April die musiekbediening in die familiediens se leisels vashou.

Chanelle is ’n boorling van Bellville en het aan Hoërskool Bellville gematrikuleer.  Sy vertel dat sy reeds as tiener by verskeie gemeentes se musiekbediening, betrokke was. Bo en behalwe haar betrokkenheid by gemeentes se musiekbedienings is sy ook ’n vrou vir Louis, met wie sy al 12 jaar getroud is en ma vir die agjarige Annabelle en die tweejarige Ben.  Sy werk ook voltyds as kantooradministrateur by ’n besige ingenieursfirma. Lees meer . . .

Sluit gerus op Donderdagaande om 18:00 in die markplein, by die byeenkomste van die omgeegroep vir vroue, aan.  Ons begin die kwartaal met ’n nuwe boek Vroue van die Bybel.  Kom skakel in en wees deel van ’n ondersteunende vrouegroep.

Navrae: Ds. René Potgieter 079 893 8104.

In hierdie Lydenstyd gesels ons telkens met Jesus oor een van sy kruiswoorde. Vandeesweek, die vyfde kruiswoord:

Hierna het Jesus, omdat Hy geweet het dat alles reeds volbring is, en sodat die Skrif vervul sou word, gesê: “Ek is dors.” Daar het 'n kruik vol suur wyn gestaan. Hulle sit toe 'n spons vol suur wyn op 'n marjoleintak en bring dit na sy mond. Toe Jesus die suur wyn geneem het, sê Hy: “Dit is volbring!” Johannes 19:28–30 (Die Bybel – 2020-vertaling)

Lees meer . . .

14 Mei:  Hoërskool Stellenberg bied vir ons ’n konsert aan.  Toegang is gratis.  Bespreek jou plek voor 12 Mei by Charlotte, 021 976 4519.

Ons beoog om vanaf 10 tot 14 September die pragtige vlaktes van die Karoo saam te verken.  Ons vertrek vanaf Stellenberg en besoek agtereenvolgens Sutherland, Beaufort-Wes en Oudtshoorn.

Koste: R5 500 – sluit vervoer, akkommodasie en etes in.

Deposito van R3 000 betaalbaar om jou plek te bevestig.

Rig asseblief enige navrae aan ds. René Potgieter by 079 893 8104.

- Vir jou gerief kan jy ’n debietordervorm hier aflaai, voltooi en aan finansies@stellenberg.co.za stuur. 

- Dorpshuis te om te deel: Die huis is sentraal geleë, naby die kerk, het ’n motorhuis, patio en braaiplek. Professionele dames tussen 30- en 40-jarige ouderdom sal oorweeg word.  Koste: R9 000 per maand, sluit twee slaapkamers in.  Skakel asseblief vir Monique by 084 55 66 393.

- Rekenaarhulp beskikbaar: Vriendelike en geduldige hulp met alle rekenaarprobleme.  Kontak Wynand by 079 412 7080.