Rakende ons tiendemaandinsameling deel ons graag inligting oor ons bronne van inkomste. Ons gemeente se werksaamhede word grootliks deur lidmate se maandelikse dankofferbydraes, Sondae se bankkollektes en die jaarlikse tiendemaandbydraes gefinansier.
Oor die afgelope jare is alle kerke genoodsaak om hulle inkomste met markverwante bedrywighede aan te vul. Voorheen kon ons uitsluitlik op bydraes van lidmate staatmaak. Die verskuiwing is egter nie op sigself negatief nie, aangesien kerke daardeur op innoverende wyse die breë gemeenskap betrek en bedien. In ons eie gemeente geskied dit deur die verhuring van ons lokale, die verhuring van spreekkamers aan terapeute by die terapiesentrum, asook die verhuring van die koffiewinkelperseel. Die feesmark, wat ’n inisiatief was om mense met klein besighede te ondersteun, dra ook tot ’n persentasie van dié inkomste by. In geheel maak dié inisiatiewe ’n derde van ons totale inkomste uit.
Ons is dus steeds van lidmate afhanklik om die res aan te vul en is dankbaar vir elke lidmaat in ons gemeente wat toegewyd daartoe bydra.
Neem asb. een van die tiendemaand koeverte in die voorportaal en plant gerus die saadjies van die Kaapse gousblom (binne-in die koevert) in jou tuin as herinnering van God se sorg in ons lewens.
