deur: Ds. Marius Breytenbach

Na die uitstorting van die Heilige Gees op Pinksterdag lewer Petrus in Handelinge 2 ’n toespraak waarin hy met gelowiges oor die betekenis van Jesus se opstanding praat. Daarna vra die mense toe vir hom en die ander dissipels: “Wat moet ons doen, broers?” (Handelinge 2:37) In die daaropvolgende driehonderd jaar ontstaan ’n ryke verskeidenheid geloofsgemeenskappe regoor die antieke wêreld en in 325 n.C. bely hulle almal saam hul eenvormige geloof in een God ( die geloofsbelydenis van Nicea). Hierdie belydenis vertel die indrukwekkende verhaal van hoe God se Gees geloofsgemeenskappe telkens in veranderende en uitdagende omstandighede geïnspireer het om steeds sinvol te leef.

Nou, in Pinkstertyd  2020, bevind ons ons in soortgelyke omstandighede as die samelewing waarna in Handelinge verwys word en moet ons opnuut weer vir die Heilige Gees vra: Wat moet ons nou in hierdie unieke omstandighede doen? Lees meer . . .

deur: Karen Cilliers

Ek glo dat ek een van die gelukkigste mense op aarde is.  Ek het grootgeword in ’n huis waar my ouers ons vier kinders met baie liefde grootgemaak het en vir ons wonderlike geleenthede gebied het. 

Ons was ’n baie sportiewe gesin en al vier kinders het provinsiale kleure in een of ander sportsoort verwerf.  Ek en my suster beide in netbal.  Ons hele gesin het ook graag tennis gespeel. Ek het tot in my dertigs netbal en aksienetbal gespeel en afgerig.  Enige sportaktiwiteit was altyd vir my lekker. 

Ek het my man, Nickey, tydens ons studentejare op Stellenbosch ontmoet en ons is in 1988 getroud.  Vir die eerste paar jaar na ons troue het ek nog ernstig netbal gespeel en ons eersteling, Nicolaas, is eers in 1994 gebore.  Kort daarna het Charl sy opwagting gemaak en met Henri se aankoms in 1998, was ons voltallig.  In 1999, toe Henri een jaar oud was, is ek met die sogenaamde oumenssiekte, Parkinson’s, gediagnoseer.  Lees meer . . .

Deur: Ds. Callie Visagie

Die ongekende ontwrigting wat die koronapandemie op byna elke vlak van die samelewing veroorsaak, impliseer dat ons voorwaar sal kan praat, nie net van n.C.  as aanduiding van na Christus nie, maar ook v.C. en n.C. met verwysing na vóór die Covid-19-pandemie en ná die Covid-19-pandemie.

In ons gemeentebelydenis spreek ons die wyse waarop ons wil leef, uit: Nader aan God, nader aan mekaar, om voortdurend te vernuwe en ’n verskil in die wêreld te maak.   In ’n onlangse artikel deur Eben Human op Netwerk24, verwys hy na die aanpasbaarheid van verskillende spesies oor lang tydperke heen en spesifiek na die luiperd wat ’n voorbeeld is van die dier wat dit waarskynlik die beste reggekry het.  Afhangende van die natuurlike omgewing en die area tot hulle beskikking vir jag, pas hierdie katsoort hom aan.  In die Krugerwildtuin is mannetjies se gewig gemiddeld 58 kg teenoor die 35 kg van mannetjies in die Wes-Kaap.   Eersgenoemde se jaggebied is 25 - 50 vierkante kilometer groot, teenoor dié in die Sederberge se 200 - 1 000 vierkante kilometer. In Indië het daar mettertyd ’n swart mutasie in die velkleur gevestig, wat die luiperd in die skadu kamoefleer en hom toelaat om meer suksesvol te jag.  Lees meer . . .

Jan Dawid Luttig se omgeegroep, bestaande uit ses gesinne, het in die verlede tweeweekliks op Sondagmiddae bymekaargekom.  Die byeenkomste het gewoonlik tussen die groeplede se huise geroteer.  Sedert die inperking ontmoet die groep stééds tweeweekliks, maar nou deur middel van ’n virtuele gespreksplatform.  Tussen die ses gesinne het hulle ’n somtotaal van 13 kinders, waarvan die jongste in graad 2 en die oudste in graad 9 is.  Jan Dawid sê dat die kinders ook aan die Bybelstudiebesprekings deelneem.  "Ons kies juis onderwerpe waaroor die kinders ook kan saamgesels.  Ds. Marius Breytenbach het ook al per geleentheid vir ons leiding rakende Bybelstudiemateriaal gegee."

Op die foto's bo is vyf van die gesinne wat ingeskakel het by ’n byeenkoms wat tydens Paasnaweek gehou is.

Foto links: Die Burgers kyk saam na die oggenddiens.  Inneke Burger sê dat die videospeletjies onderaan die TV-skerm naweke ingespan word om die jongmanne besig te hou.  

Dankie dat jy die foto met ons gedeel het, Inneke. Sterkte met die besig hou van die twee manne. Dit bly seker in dié dae ouers se grootste uitdaging. 

Foto regs: Abrie en Susan Visagie verwyl die grendeltyd op hulle plaas.  Hulle het Sondagoggend 26 April een van die koppies op die plaas uitgeklim en daar saam na die erediens gekyk.  Met die foto hieronder deel hulle hul pragtige uitsig met ons.  

Daar is sekerlik geen beter plek om God se woord te hoor as in sy pragtige skepping nie. Dankie vir die pragtige foto.

Op die foto links onder pryk die bykans 200 serpe wat Ria McMicken al vir minderbevoorregtes gebrei het.  Sy vertel dat inwoners van die ouetehuis waar sy woon, glad nie die terrein of hulle woonstelle mag verlaat nie.  Sy brei en krap in haar klein tuintjie om aan die gang te bly.  Sy is dankbaar dat sy voor die inperking genoeg wol aangekoop het sodat sy haar daarmee kan besig hou.  Sy sê sy dwing haarself om positief te bly en aanvaar dat dié omstandighede buite haar beheer is.

Op die foto regs is Pieter Pienaar aan die brei.  Hy het reeds 200 musse tydens die inperking gebrei en werk steeds volstoom voort.

Volgens ds. Why Duvenhage hoop hy dat uitreike in ’n kleiner, of afgeskaalde formaat sal kan voortgaan.  Dit sal afhang van hoeveel jongmense beskikbaar is om saam te gaan en op watter vlak van inperking die land dan sal funksioneer.  Why en ’n groep volwassenes beoog egter om al die uitreikdorpe in Julie te besoek, waartydens hulle die serpe en musse aan minderbevoorregtes sal uitdeel.

“Dit was altyd wonderlik om Sondae nader aan God, maar ook nader aan mekaar te groei,” sê ds. Marius Breytenbach.  “Na eredienste kon lidmate in ons markplein en teetuin saamkuier.  In die lig van die grendeltyd wil ons saam met ons aanlyn dienste, ook ’n virtuele markplein (gespreksgroep) skep. 

“Dit werk soos volg:  Indien jou foon of rekenaar internettoegang bied, kan jy via ’n skakel wat jy per e-pos sal ontvang, op die byeenkoms inteken.  Die twee predikante wat die oggenddienste aanbied, sal ook die gespreksgroep vanaf 16:00-16:40 lei.  Die betrokke predikante se e-posadresse sal elke Sondag net voor die eredienste op die skerm vertoon word.  Stuur jou naam, van en e-posadres vir een van hulle en hulle sal die skakel of uitnodiging na die gespreksgroep per e-pos vir jou stuur.  Om 16:00 kan jy op die skakel kliek en jy sal tot die gespreksgroep toegelaat word.  Lees meer . . .

Ons gemeente het reeds sedert die instelling van die landwye inperking gereageer op voedselnood onder hulpbehoewendes in ons omgewing.  Die eerstes wat onder ons aandag gekom het, was die hawelose mense in Bellville. Ons het een keer per week, met MES as koördineerder en met die samewerking van heelwat ander kerke, sop aan hawelose mense in die middestad van Bellville begin bedien.

Intussen het Shiloh ons genader en gevra of hulle ons saalkompleks as ’n depot en verspreidingspunt vir die verpakking van meer as R1 miljoen se kos kan gebruik.  Die kos, wat deur die Wes-Kaapse regering gefinansier is, is hoofsaaklik onder TB-pasiënte in die metropool versprei. Heelwat van ons lidmate iss betrokke by die verpakking van die pakkies.  Lees meer . . .