Arbeidsbediening groet Lene November
Lene November is ‘n geliefde kollega in die Getuienisaksiespan wat voor COVID-19 gereeld op Maandagoggende om 10:00 in hul raadsaaltjie vergader het. Die personeellede van die vier taakspanne van Getuienisaksie, waarvan Arbeidsbediening een is, Zoom steeds Maandagoggende om 09:00 om kontak te behou en op hoogte te bly van mekaar se wel en wee. Intussen het Lene se pos ongelukkig aan die einde van Maart noodgedwonge tot ‘n einde gekom. Ons sal egter vir Lene en haar kosbare insette vanaf April baie mis.
Carin Brink, streeksbestuurder van Arbeidsbediening, en die persoon aan wie se sy Lene die afgelope jare gewerk het, stuur die volgende afskeidsboodskap: “Lene, of Lien, soos ek haar genoem het, was die afgelope nege jaar en tien maande by Arbeidsbediening werksaam. Wat ’n ongelooflike voorreg was dit nie, Lien, om jou as my sekretaresse/regterhand te kon hê nie.
‘Om te kan lag,’ sê Honore de Balzac, ‘is ‘n voorreg wat aan die mens alleen beskore is.’ En ‘jou lag’ is iets wat my altyd sal bybly, Lien. Jy is iemand wat deur lag en swaarkry altyd daar was – vir almal na aan jou.
Dankie dat jy Arbeidsbediening as ’n kollega, werknemer en vriendin gedien het – ’n voorbeeld van opregtheid en egtheid. Jou positiwiteit is aansteeklik!
Jou betrokkenheid as fasiliteerder van BrightStar gaan gelukkig voort en jy kan jouself steeds daarin uitleef. Daaroor is ek baie, baie dankbaar.
Ek en al jou kollegas gaan jou werklik baie mis – jy is ’n besondere mens en die manier hoe jy die lewe leef, sal ons altyd bybly! Die kantoor staan altyd oop vir jou vir ’n vinnige inloer en koppie koffie. Jou stoel in my kantoor gaan leeg wees, maar ek is seker ek sal selfs in die stilte jou daar sien sit en jou lag geniet.
Alles wat mooi is vir die nuwe geleenthede op jou pad.”